చికెన్పాక్స్ అనేది 'హెర్పెస్ జోస్టర్' వైరస్ వల్ల వ్యాపిస్తుంది. ఒకరి నుంచి మరొకరికి వేగంగా ప్రబలే అంటువ్యాధి ఇది. పిల్లల్లోనే ఎక్కువగా వస్తుంది. దీని వల్ల దద్దుర్లు ఏర్పడతాయి. ఒకసారి చికెన్పాక్స్ వస్తే రెండోసారి వచ్చే అవకాశం లేదు. చికెన్పాక్స్ వచ్చిన తర్వాత శరీరంలో యాంటీబాడీస్ పెరిగి రోగ నిరోధక శక్తి పెంపొందడం వల్ల మళ్లీ ఈ అంటువ్యాధి రాదు.
లక్షణాలు :-
చికెన్పాక్స్ వచ్చిన తర్వాత 10 రోజుల నుంచి మూడు వారాల వరకు లక్షణాలు కనిపిస్తాయి. చికెన్పాక్స్ వైరస్ శరీరంలో ప్రవేశించిన తర్వాత లక్షణాలు కనిపించడానికి మధ్య కొంత సమయం పడుతుంది. అంటే.. వెంటనే లక్షణాలు కనిపించవన్నమాట. వైరస్ బారిన పడ్డప్పుడు ఆరోగ్యంగా ఉన్న వ్యక్తి 10 రోజుల తర్వాత మెల్లమెల్లగా లక్షణాలు కనిపిస్తూ ఉంటాయి. మొదటి సంకేతంగా జ్వరం వస్తుంది. ఒంట్లో అసౌకర్యంగా ఉంటుంది. తర్వాత శరీరంపై నీటి బొబ్బలు ఏర్పడతాయి. ఇవి ఏ భాగానికైనా రావచ్చు. ఈ నీటి బొబ్బలు దురద పుట్టిస్తాయి. కొన్ని రోజుల తర్వాత అవి పగిలిపోతాయి. ఆ భాగంలో చర్మం గట్టిగానూ, పెళవంగానూ మారుతుంది. నెమ్మదిగా నయమవుతుంది. సుమారు రెండు వారాల్లో ఇవి పూర్తిస్థాయిలో తగ్గుతాయి.
షింగిల్స్ కూడా అలాంటిదేనా?
షింగిల్స్ అనేది చికెన్పాక్స్కు సంబంధించిన వ్యాధి మాత్రమే. లక్షణాలు మాత్రం వేరు. చికెన్పాక్స్ వచ్చిన తర్వాత వైరస్ శరీరంలో అంటిపెట్టికుని ఉంటుంది. తర్వాతి దశలో అత్యంత చురుగ్గా మారిపోతుంది. దీన్నే షింగిల్స్ అంటారు. షింగిల్స్ ఉంటే చర్మంపై దురుద పుట్టించే బొబ్బలు మచ్చలుగా మారుతాయి. కొద్ది రోజుల వరకు మానకుండా ఉంటాయి. ఇవి భరించలేని నొప్పి కలిగిస్తాయి.
చికెన్పాక్స్ ఎలా వ్యాపిస్తుంది?
చికెన్పాక్స్ ఒకరి నుంచి మరొకరికి వ్యాపిస్తుంది. ఈ వైరస్ ఉన్న వ్యక్తిని తాకినప్పుడు లేదా అతడు/ఆమె శ్వాస పీల్చినప్పుడు ఈ వైరస్ వ్యాపిస్తుంది. చికెన్పాక్స్ వచ్చిన రెండు రోజుల తర్వాత దద్దుర్లు వస్తాయి. తర్వాత అవి నీటి బొబ్బలుగా మారుతాయి. ఆ తర్వాత పగిలిపోతాయి. ఆ సమయంలోనే చికెన్పాక్స్ ఒకరి నుంచి మరొకరికి వ్యాపిస్తుంది. చికెన్పాక్స్ ఉన్నవారితో సన్నిహితంగా మెలగడం, కనీసం ఐదు నిమిషాలు ఎదురుగా నిలబడి మాట్లాడటం, చికెన్పాక్స్ ఉన్నవారున్న గదిలో కనీసం 15 నిమిషాలు గడపడం వల్ల కూడా వైరస్ వ్యాపిస్తుంది.
గర్భధారణ సమయంలో వస్తే..
ఇంతకు ముందే చికెన్పాక్స్ వచ్చి ఉంటే గర్భిణులు ఆందోళన చెందాల్సిన పనిలేదు. ఇంతకు ముందు రాకపోతే మాత్రం ఆలస్యం చేయకుండా డాక్టరును సంద్రించి ముందు జాగ్రత్తలు పాటించాలి. గర్భధారణ సమయంలో దద్దుర్లు కనిపిస్తే వెంటనే అప్రమత్తం కావాలి.
ఎలాంటి అవలక్షణాలు కనిపిస్తాయి?
ఆరోగ్యంగా ఉన్న వ్యక్తులకు చికెన్పాక్స్ వచ్చినట్టయితే ఎలాంటి అవలక్షణాలు కనిపించవు. పిల్లలు, రోగ నిరోధకశక్తి తక్కువ ఉన్న పెద్దల్లో, గర్భిణుల్లో చికెన్పాక్స్ వచ్చినట్టయితే అంటువ్యాధులు ప్రబలుతాయి. బ్యాక్టీరియాకు సంబంధించిన అంటువ్యాధులు, న్యుమోనియా, రక్తంలో అంటువ్యాధి, అతిసార తదితర వ్యాధులు దరిచేరుతాయి.
వాక్సిన్ తీసుకుంటే సరిపోతుందా?
గర్భిణులు చికెన్పాక్స్ వాక్సిన్ తీసుకోవద్దు. అలాగే.. ఈ వాక్సిన్ తీసుకున్నప్పుడు అలర్జీ బారినపడిన వ్యక్తులూ తీసుకోకూడదు. ఇతర కారణాల వల్ల అనారోగ్యంగా ఉన్నవాళ్లు పూర్తిగా కోలుకున్న తర్వాత చికెన్పాక్స్ వాక్సిన్ తీసుకోవాలి.
మరకలు శాశ్వతంగా తొలగిపోతాయా?
చికెన్పాక్స్ వల్ల ఏర్పడిన నీటి బొబ్బలు పగిలిపోయి మచ్చలుగా ఏర్పడతాయి. ఇవి శరీరంపై వికారంగా కనిపిస్తాయి. అయితే.. కొంతకాలం తర్వాత ఈ మచ్చలు తగ్గిపోతాయి. ఇవి పోవడానికి ప్రత్యేకంగా మందులు వాడాల్సిన అవసరం లేదు. కొన్ని వారాల తర్వాత వాటంతట అవే కనుమరుగవుతాయి.
జాగ్రత్తలు ఇవీ..
- దద్దుర్లను, బొబ్బలను గీరకూడదు.. చిట్లించొద్దు.
- వీలైనంత వరకు పిల్లలకు గోళ్లు లేకుండా చేయాలి. నిద్రలో గోక్కోకుండా చేతులకు శుభ్రమైన గుడ్డ గానీ, గ్లౌజులు గానీ తొడగాలి.
- వీలైనంత వరకు చల్లని, గోరువెచ్చని నీటితో స్నానం చేయించాలి. దీంతో దురద కాస్త తగ్గుతుంది.
- జ్వరం, దగ్గు అధికంగా ఉంటే డాక్టర్ని సంప్రదించాలి.
- సులభంగా జీర్ణమయ్యే ఆహార పదార్థాలు తీసుకోవాలి.
- పూర్తిగా విశ్రాంతి తీసుకోవాలి.
- చికెన్పాక్స్ ఉన్న వారి వస్తువులు, బట్టలు, సబ్బు వేరుగా ఉంచాలి. విడిచిన దుస్తులను వేడి నీళ్లతో శుభ్రపర్చాలి.
- వ్యక్తిగత శుభ్రతపై ప్రత్యేక శ్రద్ధ కనబర్చాలి.
- డాక్టర్ శిల్పా అరలికర్,
కన్సల్టెంట్ ఫిజిషియన్,
కాంటినెంటల్ హాస్పిటల్స్-హైదరాబాద్
